Әлем жаңалықтарымен жалғастырамыз. Бүгінде жер-жаһанды түрлі табиғи апаттар мен әлеуметтік толқулар жайлап тұр. Колумбияда соңғы жүзжылдықтағы ең жойқын жер сілкінісі тіркеліп, 100-ден аса адам қаза тапты. Жаңадан сайланған президент елде ұлттық апат режимін жариялады. Ал Канада, АҚШ пен Индонезия орман өртімен арпалысып жатса, Англия халқы құрғақшылықтың зардабын тартуда. Бұдан бөлек, Үндістанда білім саласындағы жемқорлық пен жұмыссыздыққа шүйліккен жастар жаппай шеруге шығып, полициямен қақтығысты. Әлем жаңалықтары келесі топтамада.
ЖОЙҚЫН ЖЕР СІЛКІНІСІ
Құтқарушылар жанұшыра үйінді астында қалған адамдарды іздеп жатыр. Колумбияның батысында қуатты жер сілкінісінен 130-дан астам адам қаза тапты. Бұл елде XXI ғасырда тіркелген ең күшті зілзала. Жер асты дүмпулерінің қуаты 7,4 балға жеткен. Соңғы мәліметтер бойынша, 132 адам мерт болып, 570-тен астамы жарақат алған. 80-нен астам ғимарат қирап, жеті әуежай уақытша жабылды. Жаңадан сайланған президент Абелардо де ла Эсприелла елде ұлттық апат режимін жариялады. Зілзаладан әсіресе Перейра, Кали және Кибдо қалалары қатты зардап шеккен. Кали қаласында тонау деректерінің алдын алу үшін коменданттық сағат енгізіліп, қауіпсіздікті қамтамасыз етуге әскер кіргізілді. Құтқару операциясы күндіз-түні үзіліссіз жалғасып жатыр.
ТІЛСІЗ ЖАУ ТИТЫҚТАТТЫ
Әлемнің бірнеше елінде орман өрті өршіп, табиғи апатпен күрес жалғасып жатыр. Канаданың Британдық Колумбия провинциясында төтенше жағдай жарияланды. Тілсіз жаудың кесірінен 20 мыңнан астам адам қауіпсіз жерге көшіріліп, бір тұрғын қаза тапты. От жалыны ондаған үй мен нысандарды күлге айналдырған. Апат көршілес АҚШ-ты да айналып өтпеді. Вашингтон штатындағы Спокан қаласының маңында өрт 4 мың гектар аумақты шарпыды. 900 баспана қирап, 64 мың адам эвакуацияланған. Қазір 1700-ге тарта өрт сөндіруші жағдайды тұрақтандыруға күш салуда. Абырой болғанда, адам шығыны жоқ. Ал Индонезиядағы танымал туристік орын саналатын Бромо ұлттық саябағында 550 гектар орман өртенді. Қазір тілсіз жау ауыздықталып, негізгі ошақтар сөндірілгенімен, қауіп сейілген жоқ. Қауіпсіздік мақсатында ұлттық саябақ туристер үшін уақытша жабылды. Зардап шеккендер тіркелмеді.
ҚУАҢШЫЛЫҚ ҚЫСТЫ
Әлемнің бірқатар елінде тілсіз жау өршіп тұрса, Англия құрғақшылықпен бетпе-бет келді. Үкіметтің мәліметінше, қазір ел аумағының 70 пайыздан астамын қуаңшылық жайлаған. Аптап ыстық пен қуаңшылықтан 45 миллион адам зардап шегіп, 27 миллион тұрғынға суды пайдалану бойынша қатаң шектеулер енгізілді. Биыл Ұлыбритания осымен бесінші рет аптап ыстықты бастан өткеруде. Ал шілде айы Англия мен Уэльсте соңғы 190 жылдағы ең құрғақ ай ретінде тіркелді. Бұл жағдай ауыл шаруашылығына, ауыз су қоры мен жабайы табиғатқа ауыр соққы болып отыр.
ЖАСТАР ШЕРУГЕ ШЫҚТЫ
Үндістанда полиция мыңдаған жасты тарату үшін көзден жас ағызатын газ бен су шашатын көліктерді қолданды. Студенттер мен жұмыссыз жастар мемлекеттік қызметке қабылдау емтихандарының сұрақтары тарап кетуіне және білім жүйесіндегі жемқорлыққа қарсы наразылыққа шыққан. Бұған дейін мұндай жаппай шеру ел астанасы Делиде өтіп, салдарынан елдің Білім министрі қызметінен кеткен болатын. Ол кезде де құқық қорғаушылар 50 мыңға жуық адамды күшпен таратқан еді. Жергілікті жастар жемқорлықпен қатар, елдегі жұмыссыздық пен мүмкіндіктердің жоқтығына да алаңдаушылық білдіріп отыр.