Қырмызы Жандос

Гүлмира Тасболатқызы

СЕРІК ЖАРАСБАЕВ, ҚР ТУРИЗМ ЖӘНЕ СПОРТ МИНИСТРІНІҢ ОРЫНБАСАРЫ:

Дайындықтың негізгі бағыттары бойынша нақты міндеттер айқындалып, олардың орындалуы тұрақты бақылауда. Еліміз әлемнің үздік балуандарын Астанада қарсы алуға дайын. Чемпионатты жоғары деңгейде өткізіп, еліміздің спорт беделін одан сайын арттыруға бар күшімізді саламыз.

Рамазан Палмағанбет

МАДИНА МАНСУРОВА, ҚАЗҰУ МЕХАНИКА-МАТЕМАТИКА ФАКУЛЬТЕТІНІҢ ДЕКАНЫ:

Осы СиСи Эф компаниясына Huawei компаниясы мүше болып кіреді. Солардың қолдауымен қазір бізде үлкен орталық бар. Біздің университетте. Және Alibaba компаниясымен біз Qwen архитектура негізінде үлкен тілдік модельдерді дамытып келе жатырмыз. Қазір біздің университетте осындай жоба орындалып жатыр. ЛМ-ға қатысты. Сол әріптестер бізге қолдау көрсетіп, солардың технологияларын біз бірге дамытып келе жатырмыз.

Осылайша, қос тарап тек өндірістік жобалармен шектелмей, жоғары білікті мамандарды даярлауға да басымдық беріп отыр. Нәтижесінде жас ғалымдар халықаралық деңгейдегі зерттеулерге белсене араласып, екі ел арасындағы ғылыми ынтымақтастықты жаңа белеске көтермек.

ПЭН ВАН, СОЛТҮСТІК-БАТЫС ПОЛИТЕХНИКАЛЫҚ УНИВЕРСИТЕТІНІҢ ПРОФЕССОРЫ /ҚХР/:

Біз жасанды интеллектінің тілдік моделінен бөлек, климаттық моделін де жасап жатырмыз. Оған Әл-Фараби атындағы Қазақ ұлттық университетінің студенттерінен, магистрантынан және докторантынан 10-10 маманнан тартылған. Осы жастар біздің білім, ғылым және инновациясына, сонымен қатар кадрларды даярлау бағыты бойынша өзара көпір болғанын қалаймыз.

Бердібек Қарынбай

ЖАҚСЫЛЫҚ ӨТЕБАЕВ, ҚҰРЫЛЫС КОМПАНИЯСЫНЫҢ ӨКІЛІ:

Бұл жердің аумағы — жалпы мың шаршы метр. Бұл жерде 350 квадраттай жердің брусчаткасын ауыстырдық, бордюр салдық, скамейка, урналар қойдық, декоративный фонарьлар салдық.

«Таза Қазақстан» акциясы аясында атқарушы билік биыл қалаға 26 тынымбақ салуды жоспарлапты. Бәрі де демеушілердің есебінен жаңғыртылып жатыр. Әкімдік жаңа нысандарды саларда халықтың ұсынысын ескереді. Ал құрылысқа жауапты кәсіпкерлер маңайды абаттандырудан бөлек, көгалдандыруға да мән бергенін қадағалайды.

АЗАМАТ БЕКЕТ, ҚАЛА ӘКІМІ:

Жер телімдерін қайтару жұмыстары да жүріп жатыр. Қазіргі кезде пайдаланбайтын немесе бағыты келмейтін жерлерді біз қазір қайтарып, осылай халық игілігі үшін скверлерді жасап жатырмыз.

Ақбаян Сұлтанмұратова

Бердібек Қарынбай

 БЕЙБІТ КҮННІҢ АУЫЛЫ АЛЫС

Вашингтон мен Тегеран арасындағы түпкілікті бейбіт келісімді әзірлеуге арналған 60 күндік меморандумның мерзімі аяқталды. Тараптар құжатты әрі қарай ұзартпайтынын мәлімдеді. Иран Сыртқы істер министрлігі АҚШ-ты келісімді өрескел бұзды деп айыптап, ресми Тегеранның ешқандай қысым мен ультиматумға мойынсұнбайтынын жеткізді. Өз кезегінде АҚШ Президенті Дональд Трамп Тегеранның мәмілеге келгісі келетінін, бірақ Вашингтон қойған талаптармен келіспей отырғанын айтты. Ол Иранның ядролық қаруға ие болуына жол бермейтінін және Ормуз бұғазы Американың толық бақылауында екенін қатаң ескертті. Естеріңізге сала кетейік, маусым айында бекітілген меморандум Ормуз бұғазын ашуға және қақтығыстарды тоқтатуға бағытталған еді. Алайда бұғаздағы кеме қатынасына қатысты қайшылықтар екі ортадағы әскери қақтығыстарға ұласып, келіссөздер тоқтап қалды.

БҰҒАЗ БҰҒАТТАЛЫП ТҰР

Вашингтон мен Тегеран арасындағы осы текетірестің салдарынан Таяу Шығыстағы негізгі теңіз дәліздерінде сауда кемелерінің қатынасы күрт төмендеп кетті. Соңғы тәулікте Ормуз бұғазы арқылы небәрі үш сауда кемесі ғана өткен. Қақтығыстар басталғанға дейін бұл маңызды су жолымен күніне орта есеппен 110 кеме жүзетін еді. Ал Баб-эль-Мандеб бұғазы арқылы бір тәулікте 37 кеме өткені тіркелді. Бұған қоса, АҚШ-тың Орталық қолбасшылығы аймақтағы теңіз ережелерін сақтау мақсатында 64 сауда кемесінің бағытын күштеп өзгерткенін, үшеуін істен шығарып, тағы екеуіне тексеру жүргізгенін мәлімдеді. Осылайша, 60 күндік бітімнің аяқталуымен қос тарап ядролық бағдарлама мен Ормуз бұғазына қатысты өз ұстанымдарынан қайтпайтынын аңғартты.

АПАТ САЛДАРЫ АУЫР

Колумбиядағы жойқын жер сілкінісінен келген экономикалық шығын көлемі 9,5 миллиард долларға жуықтауы мүмкін. Ел президентінің айтуынша, бұл қаражат негізінен қираған ғимараттар мен инфрақұрылымды қалпына келтіруге жұмсалмақ. Колумбияның батысында болған 7,4 магнитудалы зілзала салдарынан 289 адам қаза тауып, 4 мыңнан астамы түрлі дене жарақатын алған. Тағы 143 тұрғын із-түзсіз жоғалғандар қатарында. Апат әсіресе Кали мен Перейра қалаларына ауыр соққы болып тиді. Бұл қызметіне жақында ғана кіріскен жаңа президент үшін алғашқы ірі сынақ. Айта кетейік, Кали қаласының тұрғындары қайғылы оқиға құрбандарын еске алу үшін арнайы шара өткізіп, қаза тапқандардың рухына тағзым етті. Жұртшылық бірлік пен төзімділік танытып, қираған қалаларды қайта тұрғызуға бекініп отыр.

АҢ-ҚҰСҚА ОБАЛ БОЛДЫ

Газа секторындағы Нусейрат босқындар лагері маңында шағын зообақ қайта ашылды. Нысан қожайыны Махмуд Гомаа соғыс өрті тұтанған кезде жануарларды аман алып қалу үшін қаладан қалаға көшіруге мәжбүр болған. Азық-түлік пен дәрі-дәрмек тапшылығынан аң-құстар қатты жүдеп-жадаған. Ветеринарлардың айтуынша, жыртқыштарды тек қатырылған етпен қоректендіру олардың денсаулығына кері әсер етуде. Оған қоса, үздіксіз жарылыс дыбыстары жануарларды ауыр күйзеліске ұшыратқан. Кейбір аңдар Рафах қаласында қалып, аштан өлген немесе із-түзсіз жоғалған. Осындай қиындықтарға қарамастан, бұл зообақ соғыс зардабын тартқан жергілікті балалар үшін қираған үйінділер арасындағы аз да болса көңіл көтеретін жалғыз орынға айналып отыр.

Айбек Қосан