Әлемдегі қауіпсіздік мәселелерін Қазақстан қалай шешпек?
Әлемдегі қауіпсіздік мәселелерін Қазақстан қалай шешпек?
11.01.2017

Еске сала кетейік, жыл басында, яғни 4-ші қаңтар күні еліміз БҰҰ ҚК уақытша мүшесі ретіндегі жұмысын ресми бастады. Бас хатшыға сенім грамоталарын табыстап, әріптестерімен танысқан соң, бірден шаруаға кіріскен.

Бұған дейін хабарлағанымыздай, еліміз тіпті бірнеше ашық пікірталастарға да қатысып үлгерді. Ол негізінен таяу шығыс түйткілі, және сол өңірдегі гуманитарлық мәселелер хақында. Бүгін сыртқы істер ведомствосының басшысы Қайрат Әбдрахманов, қауіпсіздік кеңесінің мінберінен қазақстанның 2-жылда атқаратын міндет жоспарларын жариялады. Және президент Нұрсұлтан Назарбаевтың үндеуін оқып берді. Яғни қазақстанның ұстанымы.

«Қазақстан қауіпсіздік кеңесінде көтерілетін барлық мәселе бойынша бейтараптылық пен байсалдылықты сақтай отырып, әуелгі міндет  жаһандық қауіпсіздік пен бейбітшілікті нығайту жолында  мейлінше объективті жұмыс істейтін болады. Астана Қауіпсіздік кеңесіне мүше барлық мемлекетпен терезесі тең жағдайда халықаралық қатынастар мен қауіпсіздікті қамтамасыз ету үшін мәмілеге жету мақсатында барлық күш-жігерін салатын болады» — ҚР Сыртқы істер министрі Қайрат Әбдрахманов.

Бүгін сыртқы істер министрлігінің өкілдері Астанада баспасөз жиынын шақырып, дәл осы сұрақтармен бөлісті. Дипломаттар атап өткендей, 7 міндеттің негізгі өзегі қауіпсіздік, жаһандық қауіп қатерлерге әлем қауымдастығының күш жігерін барынша жұмылдыру. Бұл ретте Нұрсұлтан Назарбаевтың былтыр мәлімдеген Әлем 21 ғасырда атты манифесі мен Біріккен Ұлттар ұйымының мәінберінен айтқан Терроризм мен экстремизмге қарсы БҰҰ аясында халықаралық коалиция құру бастамасы арқау болып отыр.

«Осы бастама аясында біз қауіпсіздік кеңесіндегі 2-жылдық жұмысымыз аясында Астана әрекет кодексі бастамаларын жасау туралы ұсыныс жасадық. Бұл орайда әрине елбасымыздың халықаралық дағдарыстарды реттеу кезінде мемлекеттілікті қиратуға бағытталған іс-щаралардан тартыну және халықаралық құқық нормаларын қайта растау бастамаларын да еске түсіргіміз келеді» — ҚР Сыртқы істер вице-министрі Ержан Ашықбаев.

Халықаралық саясаттағы Қазақстандық мүдде ше? Айта кету керек, 2018-жы жылдың қаңтар айында ҚК-дегі төрағалық марафоны  бізге бұйырмақ екен. Қамшы сілтейтін кез сол уақыт болмақ.

«Басты ойымыз осы төрағалық кезінде, 2018 жылғы қаңтар айында Орталық Азиядағы жағдай, Ауғанстандағы жағдайға байланысты ашық пікірталастарды өткізу, және олардың нәтижесінде белгілі бір БҰҰ ҚК-нің құжатын шығару болып табылады» — ҚР Сыртқы істер вице-министрі Ержан Ашықбаев.

Осындай міндеттерді жүзеге асыра отырып, еліміз екі жылдық миссиясын атқармақ. Абыроймен. Қауіпсіздік кеңесіне сайланудың өзін сарапшылар үлкен абыройға балап жатыр. Ал жеті міндетті жетесіне жеткізе орындасақ, тағы бір саты жоғарылағанымыз.



Достарыңмен бөліс: