Полицейлер биыл еліміздің бірнеше өңірінде діннің атын жамылып, адам шошырлық қылмыс жасаған 64 адамды ұстады. Қылмыстық топтың құрамында болғандардан жүзден астам қару, мыңның үстінде оқ-дәрі мен есірткі тәркіленген. Ал жасаған тірліктері тіпті жаға ұстатарлық. Мәселен, Алматыда қолға түскен қаскөйлер тұрғынды бопсалап, 7 жарым миллион теңгесін тартып алған. Павлодарда радикалдық көзқарастағы әйел алаяқтықпен айналысып, жұртты 2 млн теңгеге тақырға отырғызыпты. Ақтөбеде қамауға алынғандардың бірі интернетте діни араздық тудырған. Ал енді бірі зорлық-зомбылық жасауды жоспарлапты. Қамауға алынғандардың барлығы заң аясында жауапқа тартылды. Алды жеті, соңы үш жылға бас бостандықтарынан айырылған.