Мемлекет басшысы Қауіпсіздік кеңесі аппаратының мүшелерін жинады. Бүгін дербес мемлекеттік орган ретінде құрылған ұйымның алғашқы отырысы өтті. Бұл туралы Ақорданың баспасөз қызметі хабарлады. Қасым-Жомарт Тоқаев Аппараттың жаңа мәртебесін мемлекеттік институттарды реформалау үдерісімен сабақтас қарау керегін баса айтты. Өйткені кеңес әлемдік ахуал сан құбылып тұрған шақта сараланған шешім қабылдайтын орталыққа айналуы тиіс. Сондай-ақ сын-қатерлердің сипатын ескеріп, киберқауіпсіздікке баса мән беруді тапсырды. Ақпарат, технология, азық-түлік, су және энергетика қауіпсіздігі мәселелеріне де ерекше тоқталды.