Жас жұбайлардың әнұранына айналған той жырына — 50 жыл! Жарты ғасырлық тарихы бар туынды әр тойдың төрінде шырқалып, шаңырақ көтерген жұптардың қуанышына куә болып келеді. Ал ғасыр хитіне айналған ән небәрі жиырма минутта жазылды десем, сенесіз бе? Талайды тамсандырып, әуені күллі әлемге танылған «Дос Мұқасанның» әйгілі шығармасы жайлы Еуразия бірінші арнасы хабарлайды.
«Жастық жалын, асыл арман, ақ ниет, бақыт сыйлап ұсыныпты гүлдерін…»
Міне, той үстінде тәтті күнде жүргенімізге елу жыл. Алайда жарты ғасырдан бері жас жұбайлардың әнұранына айналған әйгілі «той жыры» жайлы не білеміз? Қазақ политехнологиялық институтының студенттерінен құралған атақты «Дос-Мұқасан» төрттігінің ішінен қолына құсын қондырғандардың алғашқысы Мұрат Құсайынов еді. Әннің тарихы да осы кезден басталыпты.
МҰРАТ ҚҰСАЙЫНОВ, «ДОС-МҰҚАСАН» АНСАМБЛІНІҢ СОЛИСІ:
«Олар бірақ бізге айтқан жоқ қандай сыйлық беретіндерін. Ол кезде енді студентпіз ғой. Жаңадан институт бітірдік. Диплом алдық, бірақ ақша жоқ. сондықтан Мұратқа бі ән сыйлайық деп өздері ұйғарған екен. оны біз білмейміз. Біз отырмыз тойда, бір уақытта Досым мен Мейірбек ал енді Мұрат Сабира сендерге арнап біз ән арнадық»
СӘБИРА ҚҰСАЙЫНОВА , МҰРАТ ҚҰСАЙЫНОВТЫҢ ӘЙЕЛІ :
«Досым Сүлеев өзі айтты: Егер Мұрат екеуің үйленбегенде бұл той жыры мүмкін басқаша болып шығатын бе еді. Мүмкін шықпайтын еді»
Сенесіз бе, жарты ғасырлық тарихы бар туынды небәрі жиырма-ақ минутта жазылған екен. Дегенмен жүректен шыққан ән, жүрекке дейін жетті.
МҰРАТ ҚҰСАЙЫНОВ, «ДОС-МҰҚАСАН» АНСАМБЛІНІҢ СОЛИСІ:
«Бізге Дос-Мұқасанға қазақ радиосына қап-қап хаттар келе бастады. Тек қана Қазақстанның аймақтарынан емес, басқа жақтан ол Дос-Мұқасан деген не деген керемет ән оны кім жазды. Сөйтіп «Той жыры» хит әнге айналды»
Сөйтіп, елу жылдан бері міндетті түрде әр тойдың төрінен табылып жүр. Мәселен, Есболат ата мен Үміт апаның отау құрғандарына да биыл 50 жыл екен. Ата-әжеміз әйгілі той жырымен үйленген мыңдаған жас жұбайдың алды десек, қателеспейміз.
ЕСБОЛАТ ДҮЙСЕНОВ, ЗЕЙНЕТКЕР:
«Сол кезде шыққан әндердің бірі той жыры болатын да. Тойымыздың осы әнмен басталып, осы әнмен аяқталды. Осы күнге дейін соның өміршеңдігі осы күнге дейін жалғасып жатқандығы өлеңнің халыққа ұнағаны, өзінің өмірі ұзақ болғандығы осы халықтың тілегінен шыққан ән болып, осы уақытқа дейін айтылып келе жатыр»
ҮМІТ ДҮЙСЕНОВА, ЗЕЙНЕТКЕР:
«Ол кезде телевидение деген жоқ. радио ғана, патифон соларға пластинка қойып, той жырын естігеніміз сол кезде. Қай той болмасын, үйлену тойы да, мерейтоларда да айтылады. Ел 25, 40 10 жыл болғанда жас жұбайлар деп осында айтамыз ғой. Жас кезімізді есімізге алып, кейбіреулерімізге көзімізге жас алып, онда қандай болып едік деген сияқты.»
Сөздерін де жасы да, жасамысы да жатқа біледі…
Махаббатың құдірет күші әлдилеп
Екі жастың табыстырған жүрегін
Жастық жалын, асыл арман, ақ ниет
Бақыт сыйлап ұсыныпты гүлдерін
Той үстінде тәтті күндер, тәтті күндер,
Жас жұбайлар шат күліңдер, шат күліңдер.
Ән салайық, би билейік, би билейік,
Шарықтасын шаттық үндер, шаттық үндер.