Новости

Жарық беруші компанияның кесірінен өрімдей ұл аяғынан айырылды. 10 жастағы ер бала есігі ашық тұрған қосалқы станцияға кіріп, мүгедек болған. Жеткіншектің туыстары осылай деді. Жауаптылардың жүгенсіздігіне ашуланған жандар ешкім көмек берген жоқ деп қынжылды. Ал мекеме өкілдері болса есіктің жабық болғанын айтып, ақталуда.

Алматыда жынмен тілдесіп, жоқты көретін жасөспірімдер көбейіп кетті! Құлағына түрлі дауыс естіліп, көзіне елес көрінетін қыз-жігіттер оқыстан ашуланып, агрессив танытатын көрінеді. Шизофрения диагнозы қойылғандардың саны былтырғымен салыстырғанда 25 пайызға артқан. Көбі аурудың атауынан қорқып, ауруханадан қашады екен.

Ақын қыз Айшолпан ішемін деп сергелдеңге түскен. Тәуелділіктен құтылған ару арнамызға берген сұхбатында өзгелерге ескерту жасады. Қазақтың дәстүрлі өнерімен көптің жүрегін жаулаған нәзік жан арықтататын дәрілерді тұтынып, кейін қатты тұтылғанын жайып салды. Денсаулыққа зияны орасан БАДтар тәуелділікке әкеп соғып, әрең құтылдым деген бұрымды бұқараны сақ болуға шақырды.

Енді елімізде жатақхана жетпей, саябақ кезіп, вокзалда түнейтін студенттер болмауы керек. Биылдың өзінде 14 жатақхана пайдалануға беріледі екен. Оның 10-ы Алматы қаласында салынып жатыр. Өткен жылы 600 мыңнан астам қыз-жігіттің 100 мыңға жуығына орын жетпей, далада қалған болатын. Ғылым және жоғары білім министрлігі 30 мың студенттің мәселесін 9 айдың ішінде шешіпті. Әлі 55 мың білім алушыны жатақхана мәселесі күтіп тұр.

Алдағы жылдары жерге жеміс-жидек, киерге киім таппай қалуымыз мүмкін. Бұған батпандаған баға емес, бал арасының жойылып кетуі сеп болады. Омарташылар осындай қорқынышты болжам айтты. Түрлі көкөністің түйнек жарып, көк біткеннің гүлдеуіне көмектесетін жәндіктің саны сағат санап азайып бара жатыр екен. Егер жер бетінен жоғалса, онда адамзатты кесапаты сұмдық катастрофа күтіп тұр!

Ойын орынды жеткізе алмай, сөзін оңынан келтіре алмайтын жастар өсіп келе жатыр. Бұл — оқулықтардағы олқылықтың кесірін осылай түсіндірген ақындардың пайымы. Бұрынғыдай шығарма жазып, мазмұндама тапсырмайтын ұл-қыздардың ойлау қабілеті ұшқыр емес дейді олар. Жалпы еліміздегі 3,5 миллионнан астам оқушы қандай кітаптан білім алып жүр? Оқулықтардың мазмұны мен сапасы талапқа сай ма?

Мұнайлы өлкедегі төзімі таусылған тұрғындар талап қойды. Салынғанына жарты ғасырдан астам уақыт болған үйде тұратын жандар түнде ұйықтауға қорқып жүрген көрінеді. Балалары үшін алаңдаған бұқара бір күнде үйінді астында қаламыз ба деп үрейлі. Ал атқамінерлерді бұл жайт алаңдатпай ма?

21 ғасырда жарықсыз бір күн отырып көріңізші?! Астанаға тиіп тұрған Қосшыда бір пәтер емес, бірнеше көпқабатты үй электр энергиясынан мүлде ажыратылуы мүмкін. Телевизор-телефонды айтпағанда, тамақтың өзін тоққа пісіретін астаналықтарға свет жоқ деген ауа жоқ дегенмен бірдей негізі. Сонша адамды қараңғыға қамағалы тұрған кім?

«Жаз болса, жарқыраған көлдің беті» Жайдары мезгіл жақындаған сайын көк шығып, айнала көркейеді, бірақ қоғамдық тәртіпті бұзып, түн ішінде бақырып, жайғасқан жерінде қақырып отыратындар көбейеді. Артынан күл-қоқсығын шашып кететіні тағы бар. Бір ғана Алматы бойынша соңғы 4 айда 20 мыңға жуық әкімшілік құқық бұзушылық тіркеліпті.

Өлген адам сөйлемейді деген бар, ал төлемейді деген бар ма? Банк алдындағы борыш азамат қайтыс болғанда қайда кететінін заңгерлер білмесе, көпшілік іздене бермейді. Қым-қуыт тірлікпен кредит аларда кім ажалды ойлапты? Бірақ мұрагерлікпен бала-шағасына мал-мүлікке қосып қарызын да қалдырып кетіпті деген жақсы нәрсе емес. Өмірден өткен әке-шешенің несиесін бала-шаға төлеуге міндетті ме?