Новости

Маңғыстау өңірінде төрт түлік әлі де қырылып жатыр. Аман қалған мал басын асыраудың өзі шаруаларға оңайға түспеуде. Жылда 1000 теңгеге саудаланып жүрген жемнің бағасы қазір 2000-ның үстіне шарықтап кеткен. «Ал Үкіметтен түскен тиын-тебенге алған азық небары 1 айға зорға жетеді», – дейді тұрғындар. Аймақтағы ахуал қашан оңалады? Жасанды жаңбыр жауғызудың машақаты қандай? Тілшіміз сабақтайды.

Гуля келе жатыр. Бұл тіркес қазір астана маңындағы Ақкөл жұртының жүрегін аузына тығатын сөздер. Айтуларынша сол ауылда тұратын келіншек біреумен ренжісіп қалса, бірден сол адамның үйін өртеп жібереді екен. «Үй өртегіш» деген лақап ат иемденген тұрғын, осы уақытқа дейін он шақты үйдің күлін көкке ұшырған көрінеді. Оған сот жоқ па? Үреу құшағында отырған елді мекенге біздің журналист барып келді.

Екі түйе үйкелсе, арасында шыбын өледі. Шымкентте әкімдік пен прокурорлардың шешімі бір жерден шықпай, саудагерлер шығынға батты. Өйткені біраз жылдан бері жұмыс істеп тұрған сауда үйі аяқ астынан сүрілетін бопты. Сатушылардың шырылдағанына құлақ аспаған Әділет департаменті техникаларын сайлап, осы маңда нысанды жермен-жексен етуге дайын тұр. Бір қызығы, былтыр ғана орталық қожайыны техникалық талаптарға сай етіп, ғимаратымды қайта тұрғыздым дейді. Биыл …

Терезесі жоқ мектеп. Атырау облысында дәл осындай білім ордасы бар. Мұнайлы өңірдегі ерекше жобамен салынған ғимараттың ішінде шәкірттерге ауа жетпей, жүректері қысылып жатқан көрінеді. Аналардың жанайқайын Берік Байғара баяндап береді.

Бүгін Алматы таңы жантүршігерлік жол апатымен атты. Елден ерте тұрып, қызының туған күніне сыйлық алып, көлігіне отыра берген жігітті басқа автомобиль қатты жылдамдықпен келіп қағып өлтірді. Ала таңнан жақынына жылу сыйлап қуантам деп ойлаған азаматты асыққан жүргізуші мерт қылып, туыстарын қайғы жұттырды. Оның қасындағы жолаушысы да сол жерде жан тапсырған. Апат орнында тағы бес адам жарақат алыпты.

Стадион үшін жанталас! Шымкенттегі Қызылжар шағын ауданының тұрғындары стадион орнына емхана салынуына үзілді-кесілді қарсы. Себебі, 70 жылдық тарихы бар спорт орнын талқандаудың ешқандай қажеттілігін көріп тұрғанымыз жоқ деп ашынады. Ал емхананы басқа орынға салуға болады деп жиналғандар полиция қызметкерлерімен жаға жыртысуға дейін барды. Қос тараптың стадион үшін текетіресін аймақтағы тілші Ғалымжан Кенжебек тарқатады.

Тағы да қара магия. Елордадағы зираттардың бірінен дуаның белгілері бар сурет табылды. Жастар бейнеленген фотоға 7 жерден ине қадалған. Онымен қоса жұпты сиқырлаған адам оқиға орнына пышақ қалдырып кеткен. Бұл заттарды әкесінің бейітін тазалауға келген қала тұрғындары тауып алыпты. Дін өкілдері бұл жәйтте қара дуа белгілері барын айтады. Ал, көріпкелдердің сөзінше, соңғы уақытта мұндай жаға ұстатарлық дүниелер көбейіп кеткен. Бұған …

Ақтөбенің шаруалары тағы шу шығарды. Олар кебектің бағасы шарықтап кеткеніне наразы. Бүгінде бидайдың тоннасы 110 мың теңге болса, одан қалған қалдықты 90 мың теңгеге саудалап жатыр дейді. Онсыз да жем-шөптен тарыққан шаруалар қыс қатты болса, мал аштан қырыла ма деп алаңдап отыр.

«Обухов» кен байыту комбинатына қатысты дау ушығып барады. Бұл жолы зауыт қызметкерлері аштық жариялады. Бұған дейін аталған компаниядан шыққан шикізаттарға тыйым салынса, енді жарық сөндіріліп, комбинат жұмысы тұралап қалды. Қызметкерлердің жартысы жұмыссыз. Акционерлер арасындағы даудан зардап шегіп отырған қызметкерлердің ендігі жағдайы не болмақ? Басшылар не дейді? Тілшіміз тарқатсын.

Көзге көрінбейтін тастанды балалар! Елімізде ЭКО-ның көмегіне жүгінген ерлі-зайыптылар енді өз эмбриондарынан бас тартуда. Отандық танымал репродуктолог осылай деп дабыл қағып отыр. Жасанды жолмен бала көтеру процесі кезінде кейбір жұптар ажырасып жатса, кейбір әйелдер қатырып қойған эмбрионнан бас тартып, жаңа квотамен басқа ұрық салдырамыз деп әлек шығарады екен. Гүлнәзия Жалғасқызы жалғастырады.