Новости

Үкімет басының қаулысын пысқырмайды да. Елорда тұрғындары өз үйлерінің маңынан салынып жатқан құрылыстың заңсыздығын анықтап, тоқтатуды тапсырған Асқар Маминнің талабын құрылыс компаниясы орындамай отыр деп айыптады. Естеріңізге салсақ, жұрт бір жыл бойы құрылысқа қарсылық білдіріп, бірнеше рет наразылық шараларын ұйымдастырған еді. Тек Мәжіліс депутатының сауалынан соң ғана бұл мәселеде сең қозғалды. Алайда, оның өзінде құдайын ұмытқан құрылысшылар жұмысты тоқтатар емес.

Нұр-Сұлтандағы жалғыз гуманитарлық колледж жекеменшік басқаруға өтуі мүмкін. Оқу ордасын «Астана» университетінің қарамағына беру көзделіп отыр. Елордадағы педагогтар даярлайтын оқу ордасының қызметкерлері Президенттен араша сұрап, бейнеүндеу жолдады. Карантин уақытында қабылданған шешімді қисынсыз санайтын оқытушылар бір шикіліктің барын сеземіз дейді. Олардың талабы қандай?

Елордада «Ең үздік жас отбасы» байқауында топ жарған жанұяға жарты миллион теңгенің сертификаты табысталды. «Отбасылық құндылықтарды насихаттайтан бұл шараның биылғы пандемия кезідегі маңызы зор» дейді ұйымдастырушылар. Өйткені, карантин кезінде тұрмыстық қиындықтарға шыдамаған жастар арасында ажырасулар жиілеп кетіпті.

Гинекологтың кесірінен баламның жүрегі тоқтап қалды. Осындай шағыммен Семей қаласының тұрғыны біздің редакцияға хабарласты. Жүктілік кезінде ауырған ана бірнеше рет дәрігеріне барып шағым айтқан. Алайда маман селқос қарағанға ұқсайды. Ұзақ күткен сәбиін өлі туған әйелді әріптесім тыңдап қайтты.

Халықаралық Junior Eurovision байқауында еліміздің намысын қорғаған Қарақат Башанова 2-ші орын алды. 12 мемлекеттің дарабозы бақ сынаған конкурста отандасымыздың жұлдызы жанды. Көрермендер мен қазылар алқасының дауыс беруі нәтижесінде Қарақат 152 ұпай жинаған. Миллиондаған көрермен онлайн тамашалаған әннің әуезі өзгелерден ерекше. Қарақат бес жыл бұрын дүниеден озған әкесіне деген сағынышты осы шығармамен жеткізбекші болған.

Талдықорғанда газ баллоны жарылған кезде денесі түгелге жуық күйіп қалған 14 жастағы жасөспірім қайтыс болды. Зардап шеккен өзге екі баланың жағдайы орташа ауыр. Ал, қалалық көпбейінді және облыстық ауруханада жатқан бес адамның халі өте ауыр екен. Бұл туралы аймақ денсаулық сақтау басқармасының баспасөз қызметі хабарлады. Еске салайын, сұмдық оқиға өткен аптада қала іргесінде орналасқан Еркін ауылында болған еді. Жер үйде …

Қарағанды облысында 40-қа жуық жолаушысы бар автобус аударылып қалды. Жол апаты салдарынан түрлі дене жарақатын алған 65 жастағы әйел шұғыл ауруханаға жеткізілген.

Жамбыл облысында ауа райының қолайсыздығынан бір сәтте 100-ге жуық көлік қар құрсауында қалды. Республикалық маңызы бар «Алматы-Термез-Ташкент» автожолында төтеншеліктер ақ ұлпаға көміліп қалған темір тұлпарларды сүйреп алып шыққан. Нәтижесінде 51 адам, оның ішінде 12 бала құтқарылды.

Шымкентте Қазақ көз ауруларын емдеу орталығы бір ай бойы тегін емдемек. Бұл игі іс Дүниежүзілік мүгедектер күніне орай қолға алынып отыр. Орталық мамандары көзі дұрыс көрмейтін азаматтарды желтоқсанның 1-і мен 31-і жұлдызы аралығында ем алуға шақырады. Бұл акция аясында кімдерге тегін көмек көрсетіледі?

Айдалада ақ отау, суы, газы жоқ отау. Ақтөбе облысында арман болған 10 сотық жерді алып, баспанасын салып алған тұрғындар өркениеттен жұрдай елді мекенде тұрып жатыр. Шенділерге айтқан шағымнан нәтиже болмаған олар әкім-қараларды қақаған суық үйде тұрың көріңдер деп үйлеріне шақырды.