Новости

Шымкентте үш баланың өліміне себепші болған 42 жастағы дезинфектор 5 жылға бас бостандығынан айырылды. Болат Жәнібеков сот шешімімен жазасын қауіпсіздігі төмен түзеу мекемесінде өтейтін болды. Сондай-ақ, жәбірленуші тарапқа 5 млн теңге моральдік өтемақы төлеуге міндеттелді. Алайда, айыпталушының жұбайы судьяның бұл шешіміне наразылық білдіруде.

Бейіттер қорғанымызға дейін жетті. Алматыдағы Бостандық ауданының тұрғындары зираттармен көрші болғанына қынжылуда. Өйткені, аумақты 49 жылға жалға алған салттық қызмет көрсету комбинаты санитарлық талаптардың нормасын сақтамай, мүрделерді тым жақын жерге жерлей бастаған. Бұған наразы жұрт құзырлы органдарға хат жазып, қатаң бақылауда ұстауын талап етіпті.

Елімізде 200 мыңнан астам зейнеткерге біржолғы қаржылай көмек көрсетілмек. Бұл мақсатқа бөлінген сома 2,3 млрд теңгені құрап отыр. Бұл туралы Еңбек және халықты әлеуметтік қорғау министрлігінің баспасөз қызметі мәлімдеді. Біздің елде 2 миллионнан астам зейнеткер бар екенін ескерсек, аталған көмектің теңізге тамған тамшыдай екенін аңғару қиын емес. Атаулы мерекеге орай тілшіміз қазыналы қарттарымызбен кездесіп, тілдесіп қайтты.

2024 жылға қарай елімізде тағы 32 жол участогы ақылы болады. Бұл жалпы автожолдардың 11 мың шақырымын құрайды. Ол дегеніміз ешқандай шұрық-тесіксіз сапалы трассалар пайдалануға беріледі. Оның жарты бөлігі биыл тестілеуден өтеді екен. Жолға жауаптылардың сөзінше, егерде аталған тораптар сынақтан сәтті өтсе, алдағы уақытта ақылы жолдар санатына қосылады. Сондай-ақ, жол жөндеп жатқан мамандар жүргізушілердің қорқынышты түсіне айналған «Алматы-Қарағанды» бөлігіндегі жұмыстардың барысымен …

Қолданылған медициналық бетперде, шприц пен ампулалар ұлт денсаулығына қауіп төндіруде! Мәжіліс депутаттары осылай деп дабыл қағуда. Олардың сөзінше, бір ғана Нұр-Сұлтанда жылда 400 мың тонна медициналық қалдық қордаланады., Алайда осы мәлімет төңірегінде ойланған жан, шенеунік, не мемлекеттік мекеме аз, дейді.

Иә, бұл күні қазақтілді аудитория интернеттен не көріп жүр? Сандар мен статистикаға мән берсек, арзан әзіл мен боқауыз сөзге құрылған вайндар, сериалдар көпшіліктің сұранысында. Цензурасы жоқ елде тұрамыз. Бірақ, сөз бостандығына еркіндік бар екен деп, ауызекі былапыт сөзді жұрт алдына шығаруға болады деп есептейтін азаматтар, одан қалды тұтас орталықтар бар көрінеді. Оларды кім бақылап, қадағалайды?

Елорда қатаң карантин режиміне қайта оралуы мүмкін. Қаланың бас санитар дәрігері тұрғындарды осылай деп қорқытып қойды. Жанна Пірәлиеваның сөзінше көпшілік орындарда қарапайым санитарлық талаптардың өзі сақталмай жүр. Тұрғындар осыған дейін айтылып келген ережелерді мүлде ұмытты деуге болады. «Осылай жалғаса берсе індет өршіп, қаланы қайтадан карантинге жабуға мәжбүр боламыз», — дейді бас санитар.

Ұлттық экономика министрлігіне қарасты статистика комитеті берген мәліметтерге сенсек, биылғы жылдың екінші тоқсанында елде жұмыссыздық деңгейі 5 пайызға ғана артқан. Салыстыру үшін айтайық, былтыр бұл көрсеткіш небәрі 0,2 пайызға төмен болатын.

Еліміздегі 6 мың адамның азаматтығы жоқ! Есесіне олардың арасында әлі күнге дейін Кеңес Одағының қызыл паспортымен жүргендер бар. Бұл елдегі халықаралық ұйымдардың мәліметі. Мамандар осындай жандарға көмектесуге тырыссақ та, ондаған жыл құжатсыз жүргендер азаяр емес дейді.

Алғың келсе, бер! Тақырып мемлекеттік гранттар жайлы. «Бизнестің жол картасы» бағдарламасы аясында берілетін 5 млн-ды алу үшін 600 мың, ал 500 мың теңгелік грантты жеңіп алу үшін 150 мың теңгеге дейін пара сұрайды. Өз ішінде бұны «шапка» деп атайды екен. Жарайды, қалай болғанда да қайтымсыз ақша қалтаға түсті делік. Бірақ бизнес жоспарында қырамын-жоямын деп көрсеткендер кредиттерін жауып, көлік мініп, үйін …