Новости

Түркістан облысындағы Кентау қаласының тұрғындары «апатты» деп танылған баспаналарын тастап кетуден бас тартып отыр. Арнамызға шағымданушылар мамандар сүрілуі тиіс деген тұрғын үй әлі талай дауылға төтеп беретіндігін айтады. Тек, төбемізден сорғалаған суды тоқтатып, шатырымызды жамап берсе, арғы жағын өзіміз-ақ реттейміз дейді.

Әскери бөлімнен қару-жарақпен қашып, кейінен қолға түскен Абылай Балғынбайды жұрт жамандыққа қимай отыр. Ауылдастары кіші сержанттың соншама көп қаруды бір түннің ішінде жалғыз өзі арқалап кетуі мүмкін емес дейді. Қазір, әскери қызметкер қамауда жатыр. Оған қатысты қылмыстық іс қозғалып, тергеу амалдары басталған. Сонымен күш-құрылымдарын аяқ астынан тік тұрғызған Абылай Балғынбай деген кім?

Бейнетіміздің зейнетін көрер шағымызда далада тентіреп қалуымыз мүмкін! Ішкі істер органдарында 20 жылдан еңбек етіп, қазір отставкаға шыққан бір топ ақтаулық полицей пәтерлерінен айырылудың сәл ақ алдында тұрғанын айтады. Көбі қалалық полиция департаментінің құрылуына сүбелі үлес қосқан тәртіп сақшылары. Алайда, қалалық және облыстық сот отставкадағы қызметкерлерге пәтерді өз атына аудару жөнінде қаулы шығарғанымен, құзырлы орган бұл шешіммен келіспей отыр.

«Бек Эйр» 12 адамның өлімін менің мойныма артайын деп отыр! Ұшақ соғылған үйдің иесі Ришат Қалибек осылай деп мәлімдеді. Алдын ала сот тыңдалымына келген азаматтың қорғаушы жалдауға да жағдайы келмейді екен. Ал журналистерден үнемі қашып жүретін Бек Эйр басшысы Нұрлан Жұмасұлтанов бүгін сұхбат берді. Алайда сотқа берудегі түпкі мақсаты не екенін ашып айтпады.

Ақтөбеде жүздеген адам қаржылық ұйымның ғимаратына шабуыл жасады. Оңай олжаға кенелем деп ойлағандар миллиондап қаражат салғандарын айтады. Ол аздай, басындағы пәтерін, астындағы көлігін сол күдікті қаржылық мекемеге ұстата салғандар да жетеді. Жеме-жемге келгенде не еселеп қайтқан ақша жоқ, иә, уйдені үйіп-төккен басшы жоқ, салымшылар сенделіп жүр. Алданып қалғандардың ақшасын кім қайтарады?

«Самұрық-Қазына» Ұлттық әл-ауқат қоры мен Солтүстік Қазақстан облысының әкімдігі өзара ынтымақтастық туралы меморандумға қол қойды. Тараптар аймақтағы жаңа өндіріс орындарын ашу мен әлеуметтік-экономикалық жағдайды дамытуға келісті.

Жұмбақ өлім! Түркістан облысында 8-ші сынып оқушысы белгісіз жағдайда мерт болды. Оның денесін мектеп ауласынан мұғалім тауып алған. Алғашқы медициналық көмек көрсеткенімен, жасөспірімді ажалдан арашалап қала алмапты. Қазір, осы оқиға бойынша Қазығұрт аудандық полиция бөлімі тергеу амалдарын бастап кетті. Күдікке марқұмның сыныптасы ілігіп отыр.

«Байлықтың үстінде отырған жалаңаяқпыз». Түркістан облысындағы Созақ ауылының тұрғындары осылай деп арнамызға шағымданды. Елді мекендегі Кеңестік кезеңде орнатылған трансформатор әлі күнге дейін жаңартылмаған. Тиісінше, 50 жылдық ескі құрылғы есті кетіріп, жарық жиі сөнетін көрінеді. Салдарынын тұрмыстық техникалар да көп істен шыға бастаған. Бұл аздай шалғайдағы жұртшылыққа осы уақытқа дейін сапалы ауыз су да жеткізілмепті.

«Алматыдағы қарттар үйіндегі жандарға асты еденге, әжетхананың қақпағына қойып береді. Ал қарсылық танытқан қарттарды тыржалаңаш шешіндіріп, еденге жатқызып қояды». Арнаулы әлеуметтік қызмет көрсету орталығында тұратын Виктория Баженованың осындай мәлімдемесі жұртшылықты да, қала әкімін де елең еткізді. Шаһар басшысы бүгін өзі барып қарттар үйіндегі жандардың тыныс-тіршілігімен танысты. Екі тараптың пікірлерін тыңдаған әкім арнайы комиссия құрылып, тексеру жүргізетінін жеткізді.

«Қытайдан келе жатқан жолаушыларды Зайсанда емдетпекші. Ол үшін ауылдан арнайы амбулаторияның ғимаратын бөлгелі жатыр!». Дәл осындай сарындағы ақпар Аспанасты елімен шекаралас тұрған аудан жұртын састырып, түн ішінде қауырт жиналуға түрткі болған. Әлеуметтік желі, месенджер арқылы лезде тараған дақпырт бүкіл ел тұрғындарын аяқтан тік тұрғызғандай болды. Ақыры ауылға облыс әкімі барып, мән-жайды түсіндіріп көрген болатын.