Новости

40 миллиард теңге. Жыл басынан бері Қазақстаннан шетелге аударылған қаражаттың көлемі осындай. Шығыстың сомасы белгілі, ал кірістің көлемі екі есеге азайып кеткен. Халықаралық қаржы аударымдарының жүйесі арқылы белгілі болып отырған ақпараттың анығы осы. Миллиардтаған ақшаны кім және не үшін шетелге асырды?

Ақтөбеде ондаған адам үй аламын деп далада қалды. Олар Тұрғын үй копоперативіне алданып қалыпты. Салы суға кеткен салымшылар бүгін облыстық прокуратура ғимаратының алдына келіп, шу шығарды. Алдап кеткен директор келіншекті қамауға алуды талап етті. Өйткені, үстінен іс қозғағанымен, жүктілігін ескеріп оны үйқамаққа алған. 63 млн теңгеге алданып қалған салымшылар директор тағы жазадан сылытып кетсе, біз жер сипап қаламыз деп алаңдаулы.

Алдағы уақытта елімізде жол жиегінде әрқайсының құны 23 млн теңге болатын әжетханалар орнатылады. 2022 жылға дейін дәл осындай 304 дәретхана салынбақ. Қарапайым арифметикаға салсақ бас-аяғы 7 млрд теңгеге жуқы бөлу жоспарланып отыр. Ішінде жанға қажетті дүниенің барлығы дерлік болатын көрінеді. Ыстық су, орталық кәріз жүйесіне қосылады. Айналасы тәулік бойы күзетіледі. Аталған дәретханаларға қаржы қайдан бөлінеді? Қандай ұтымды тұстары бар?

Бұдан былай мұғалімдер көшеге шығып қоқыс жинап, пайдасы жоқ іс-шараларға баруға міндеттелмейді. Бұл талапты ескермей, ұстаздарды өзге жұмысқа жеккендер әкімшілік жауапкершілікке тартылады. Педагогтардың мәртебесі қаралған Мәжіліс отырысында осындай деректер белгілі болды. Әр сенбіде қолына қап ұстап, қоқыс жинайтын, қызықсыз концерттерге билет алуға міндеттелетін мұғалімдерге тағы қандай жақсы жаңалық бар?

Ақмола облысы Макинск ауылының тұрғындары болашақта ұрпақсыз қаламыз ба деп қорқады. Олардың балалары суық мектепте оқып, өкпе тұрмақ, бүйрек пен қуықтан да қалыпты. Білім ордасының жайын айтып бармаған жерлері жоқ. Жанайқайын естиін құлақ таппаған соң журналистерге жүгінуге мәжбүр болған.

Қызылорда-Құмкөл трассасындағы сұмдық жол апатынан сегіз адам қаза тапты. Қайғылы жағдай бүгін таңғы 4 жарымдар шамасында тіркелген. Мұнайшылар мінген автобус аударылып, ішіндегі жолаушылардың кейбірі бірден тіл тартпай кеткен. Ал ауыр жараланғандары бір сағат бойы дәрігерлерді күтіп жатыпты. «Жедел жәрдем» көлігі ішінде демі үзілгендері де бар.

Еліміздегі жантүршігерлік жол апаты мұнымен бітпейді. Бүгін таңғы алтылар шамасында Елордада жаяу жүргіншілер жолағынан өтіп бара жатқан әйел адам қаза тапты. Тағы бір жасөспірім ауруханада ауыр халде жатыр. Оларды өзгенің көлігін мас күйінде ұрлап, рөлге отырған есерсоқ ер адам қағып кеткен.

Жаңа жылдан бастап бензин 10 теңгеге қымбаттауы мүмкін. Үкіметтің бүгінгі отырысында Қаржы министрі Әлихан Смайылов осылай деп ашық айтты. Жанармай бағасының көтерілуіне екі себеп бар екен. Біріншіден, алдағы жылдан бастап әлеуметтік саланың шығындары көбейеді. Мәселен, мұғалімдердің жалақысы өседі. Екіншіден, шағын бизнестің салықтан босатылуынан бюджетке түсетін кіріс азаяды. Соның орнын толтыру үшін Үкімет мұнай өнімдерінің акцизін көтеріп жатқан көрінеді.

Ел медицинасындағы кезекті дау. Көкшетаулық дәрігерлер өкпе қабынуымен түскен балақайды сол қолынан айырды. Екі жастағы баланың анасы бұған екпенің себеп болғанын айтады. Азаматшаға сенсек, мамандар қателік қана жібермей қоймай, уақыт жоғалтқан. Он екі мүшесі сау баланың неліктен бір қолы кесілді? Дәрігерлер не дейді? Министр бұл сұмдық жайттан хабардар ма? Толығырақ келесі материалда.

Адамнан айла артылған ба? Енді, алаяқтар Дубайда отырып алып, ақша істейтін болған. Мәселен, еліміздің бір топ кәсіпкерін шетелдегі азамат арзан бағамен ауыр техника жеткізіп беремін деп алдап, тақырға отырғызып кеткен. Шығын көлемі де аз емес, шамамен 100 млн теңге. Бар жиған-тергенін айлакердің есеп-шотына аударғандар бір жылдан бері әділдік іздеп келеді. Ал, жалған кәсіпкер интернеттегі жарнамасы арқылы жаңа жемтігін іздеп жатыр …