Новости

Бүгінгінің ұрылары да заманға лайық түрлі айла тәсілдерді ойлап табуда. Мәселен, қарақшылар кезекті құрбанын көшеден емес, әлеуметтік желіден іздейтін болған. Яғни ол сіздің досыңыз, таңысыз болуы әбден мүмкін. Мұндай қылмыскерлер жұлдыздардың минут сайын салып жатқан фотоларын аңдып, ізіне түседі екен. Ол тіпті қарапайым адам болуы да мүмкін. Көлігінің нөмірін, үйін, үздіксіз салудан шаршамайтын инста жұлдыздардың қаншасы қылмыскердердің құрбанына айналды?

Алматыда бірнеше жігіт 8-сынып оқушысын ұрлап әкетіп, топ болып зорлап, артынан ес-түссіз күйінде қоқысқа лақтырып кеткен. Қазір туыстары қыздарының ар-намысын аяққа таптағандарды жауапқа тартқыза алмай әлек болуда. Тергеу амалдарына көңілдері толмайтындарын айтады. Өйткені полиция күдіктілерді қамауға алмақ түгілі, олардан әлі күнге жауап та алмаған.

«Алматы – іңкәрім менің!». Биыл 20-шы жыл өткелі жатқан ретро-әндердің фестивалі бұрынғыдан өзгеше. Өйткені, концерттен түскен қаржы тіке Арыс қаласына жөнелтілмек. Фестиваль ұйымдастырушылары жойқын жарылыстан қираған үйлерді қалыпқа келтіруге осылайша көмектескісі келіпті. Ал, аты бүтін Алашқа мәшһүр болған ескі әндердің естілері шырқалатын концерт екі күннен кейін болады.

Нұр-Сұлтанға арнап гимн жазған адамға 3 млн теңге сыйақы беріледі! Елорда билігі ұйымдастырған байқау осыдан бір ай бұрын басталған еді. Алайда әлі күнге лайықты шығарма табылмапты. Комиссия мүшелерінің айтуынша, байқауға түскен туындылардың дені той әндерінің деңгейінде екен.

Ақтөбеде вокзалдың автотұрағын басқаруға алып, ақша жинап келген кәсіпкердің әрекеті заңсыз болып шықты. Бизнесменнің «барлық жағдайды жасаймын» дегені құр уәде болып қалғаны былай тұрсын, тіпті мемлекеттік-жекеменшік серіктестік жөніндегі әкімдікпен жасаған келісім-шарты да дұрыс емес екен. Былықтың бәрі прокурорлардың тексерісі кезінде әшкере болған. Енді кәсіпкерге қандай шара қолданады? Майшелпекке айналған нысан енді кімнің қолына өтпекі?

Қызылағаш оқиғасын еске салатын жалғыз ескерткіш ескерусіз қалған. Монументтің тоз-тозы шығып, граниттік тақтайлары да түсіп жатыр. Арада 9 жыл өтсе де, ешбір жөндеу көрмепті. Мемориалдың қираған көрінісі әлеуметтік желілерде жарияланғаннан кейін ғана жергілікті әкімдік іске кіріскен.

Отандық компанияларды шеттетпей, мүддесін ескеру керек! Мұнай саласындағы басшылық қызметтерді өзіміздің мамандар да атқара алады. Атырауға жұмыс сапарымен бараған Қасым-Жомарт Тоқаев ірі компания басшыларын шетелден кадр тартпай елдегі қызметкерлерге назар аударуға шақырды. Мұнайшыларды мерейтоймен құттықтамаққа келген Президент саладағы біраз мәселеге көңіл бөлу керектігін айтты.

Алматы облысында басына бұрағыш қадалған жігіт мүгедек болып қалуы мүмкін. Дәрігерлердің дер кезінде көрсетілген көмегінің арқасында ол комадан шыққан. Бірақ, миына 5 сантиметр темір кіргендіктен жуық арада жүріп кетуі екіталай. Туыстары ауыр жарақат салған күдіктіні қатаң жазаға тартуды сұрауда.

«Найман, суан, ысты». Елімізде қаптамасына ру аттары жазылған сыралар сатылымға шықпақ. Ішімдік сыртына ру аттарын тайға басқандай етіп көрсеткен компания мұны маркетингтік әдіс-айла деп тапқан. Кәсібінің көрігін осылайша қыздырмақ болғандардың әрекеті көпшіліктің ызасын тудырып үлгерді. Жер-су аттары қалып, енді ру атауларын масқаралағандар жазалана ма? Қоғам белсенділері не дейді?