Новости

Шетелден әкелінетін көліктерді 10 тәуліктің ішінде уақытша тіркеуге қою қажет. Мұндай бастаманы ІІМ көтеріп отыр. Себебі, соңғы уақытта еш жерде тіркелмеген машиналар жол ережесін өрескел бұзып, айыппұлдан сытылып кетіп жатыр. Бұл соның алдын-алу үшін жасалып отырған қадам екен. Егерде заң алдағы уақытта қабылданса, қол жетімді бағаға Армениядан көлік әкелген азаматтарға қайтпек керек?

Бір айда игереміз! Бөлінген қаражатты жұмсап үлгереміз! Бүгін Үкімет отырысында министрлер мен әкімдер жылдағы әніне салып, айтып ауыздары үйренген уәделерін үйіп төкті. 7 айдың ішінде жаратпаған миллиардаған соманы сұранып тұрған салаларға бағыттаймыз деп сендірді.

Баласын 6 жастан мектепке бергісі келмейтін ата-аналарға ешқандай айыппұл салынбайды! Үкімет отырысынан кейінгі журналистермен жүздесуінде Асхат Аймағамбетов осылай деп мәлімдеді. Министрдің айтуынша, кейбір оқушыларға мектеп табалдырығын 8 жастан аттауына да рұқсат. Білім министрі тағы не айтты?

Бала асырап алғымыз келеді! Алапат өртте бес бірдей қызынан айырылған ерлі-зайыпты ауыр қайғыдан соң алғаш рет сұхбат беріп, жоспарларымен бөлісті. Ел қабырғасын қайыстырған оқиға осыдан жарты жыл бұрын болып еді. Сол кезден бері Евгений мен Жанымгүлді жұбатқандар да, сөккендер де, қайғыдан қаржы таппақ болғандар да шыққан.

Алматы облысындағы Долан ауылының тұрғындары өлексенің иісіне тұншығып отырғандарын айтып арнамызға шағымданды. Елдімекеннің дәл іргесінде жануарлар қорымы бар екен. Онда ауру жан-жануарлардың өлексесі тасталатындықтан балалардың үстіне жара қаптай бастады деп дабыл қағуда. Ал ветеринарлар мал қорымына жақын үй салған тұрғындардың өздерін кінәлауда. Тақырыпты тараптардың пікірін тыңдап қайтқан тілшіміз тарқатады.

200 млн теңгеге орнатылған еуропалық үлгідегі қоқыс контейнерлерінің пайдасынан зияны көп! Тұрмыстық қалдықтың астында қалудан қауіптенген талдықорғандықтар осылай деп дабыл қақты. Былтыр ғана қойылған 300-ге жуық жәшік құр қаңсып қалған. Ал, оның маңы дер кезінде тазаланбағандықтан, айналаны қауіпті кеміргіштер жайлап алыпты. Содан сескенген әлеумет ертең қандай да бір індет тарайды ма деп үреймен өмір сүруге мәжбүр.

Елімізде жылдық пайыздық үлесі 1 000 процентке дейін баратын микрокредиттік ұйымдар көбейген. Бұл мекемелер тұтынушы туралы еш мәліметті тексермей кез-келген көлемдегі несиені бере береді екен. Тіпті, жұмыс істемейтін студенттердің өзіне еш кедергі жоқ. Осылайша, баласы жеңіл несиеге ұрынып, қарызға батқан қарағандылық тұрғын арнамызға шағымын айтты. Бұл не деген батпан құйрық?

Бақандай 11 мұнай базасының ортасында отырған елорда іргесіндегі елдімекен тұрғындары көшірілуі мүмкін. Алайда бензин иісіне тұншықса да кейбірі қауіпті тұрағын тастағысы жоқ. Керісінше кейіннен келген мұнай базаларын көшірсін деуде. Енді бір топ ұсынылған пәтерге разы болмай, қарсылық білдіруде.

«ҚазАвтоЖол» ағып жатқан өзенімізді көміп тастады! Ерейментау ауданына қарасты Сайдалы елді мекенінің тұрғындары біздің редакцияға хабарласып осындай шағымын айтты. Жаңадан салынған жол бұл жақтың тұрғындарының тұрмысын жеңілдеткеннің орнына қиындатып жіберген көрінеді.