Анасы қайтыс болғаннан кейін Катяның өмірі түбегейлі өзгерді. Сабаққа және жігіт атаулыға қарауға шамасы жоқ оның бар мақсаты – жасөспірімдерге тән өтпелі кезеңде жүрген сіңлісі Дашаға қамқор болу. Даша болса, үнемі жағымсыз жайттардың ортасынан табылып жүреді. Бұл жолы да Дашаға өзін қылмыстық оқиғаға араластырған жігіті Кирилл қоқан-лоққы көрсетуде. Апалы-сіңлілі Мәскеуге қашып кетіп, онда Лиза тәтелерінің үйін паналайды. Өмірлері бірқалыпқа түсе бастады. Катя тәтесінің сән салонына жұмысқа орналасады. Алайда Дашаның қарап жүрмейтіні бесенеден белгілі ғой. Оның кесірінен қос қыз тағы да далада қалады. Катяға сән салонындағы келушілердің бірі Роза қол ұшын созады. Шығыс мейрамханасы бар ол Катяны жұмысқа алып, сіңлісімен бірге оның үйінде тұруға рұқсат береді. Көп ұзамай, Катя махаббатын жолықтырады.