Алматыда жылу мен ыстық суға қарызы бар тұрғындардың өсімпұлы кешіріліп жатыр. Олар бар-жоғы тұтынған қызметтің берешегінен құтылса болды, жауапты мекеменің ешқандай шатағы болмайды. Борышкердің бұғатталған банк шоттары шешіліп, шектеулерден құтылады. Акция 2026 жылдың соңына дейін жалғасады. Ол үшін «Алматы жылу жүйесі» компаниясына өтініш жазып, eGov арқылы қарыздың төленгенін растайтын қағазды көрсетсеңіз жетіп жатыр. Ал берешекті мүлдем төлемегендер жылу мен судан ажыратылып, қарыз сот арқылы өндіріледі.