1Париждегі дүкен иелері сенбіге яки бүгінге жоспарланған жаңа наразылық толқынынан қауіптеніп, ғимарат витриналарын тақтаймен шегелеп тастады. Елисей алаңы бойындағы кәсіпкерлер ықтимал вандализм мен тонаудың алдын алу үшін терезелерін қалың ағашпен немесе темір тормен қаптауда. Бір кездері адам қарасы үзілмейтін сауда аймағында қазір адам аяғы сиреген, үрейлі атмосфера орнаған. Жергілікті тұрғындар мен кәсіпкерлер өткен демалыста болған тәртіпсіздіктер қайталана ма деп алаңдап отыр.
ДҮКЕН ИЕСІ:
Ертең Парижде үлкен шеру өтеді. Мен арам пиғылды адамдардың келіп, тереземді шағып, 30 жылдан астам уақыт бойы жасаған еңбегімді құртқанын қаламаймын. Олар менің және осы аймақтағы басқа да кәсіпкерлердің бизнесіне зиян келтіреді. Қазір Париж қауіпсіз қала емес, сондықтан шетелдіктер де мұнда келуді тоқтатады.
Демалыс күндері өтетін шерулерге байланысты Парижге полиция күштері жұмылдырылды. Франция билігі ел аумағындағы тәртіпсіздіктерді болдырмау үшін көшеге 70 мың тәртіп сақшысын шығаратынын мәлімдеді. Қоғамдық қауіпсіздікті қамтамасыз етуге элиталық бөлімшелер мен қаруланған мобильді жасақтар да қосылған. Айта кетейік, соңғы апталарда өмір сүру құнының қымбаттауы студенттер мен жұмысшыларды көшеге шығуға мәжбүр еткен болатын. Ал билік өкілдері бұл жағдайды радикалды топтар мен бұзақы жастар өз пайдасына жаратып, қалада тәртіпсіздікке бой алдырып отырғанын айтады.