Новости

Кен орнында еңбек ететін 500 адам жұмыссыз қалуы мүмкін. Солтүстік Қазақстандағы Обухов тау-кен байыту комбинатындағы дау тағы жалғасты. Бұл жолы өндірілген өнімді тасымалдауға жергілікті полиция кедергі келтіруде. Сол себепті де бірнеше күннен бері кәсіпорынның жұмысы тоқтап тұр. Экспорттың арқасында жалақы алып отырған жұмыскерлер ертеңгі күндеріне алаңдаулы. Бизнеске негізсіз кедергі келтірді деп шағымданған олар, енді ел Президентіне хат жолдамақ.

Парламент депутаттарының каникулға шыққанына тура 1 айдың жүзі болды. Біреуі демалыста, өзгесі өңірлерді аралап жүр. Ал кей халық қалауларымен байланысқа шығу тіпті мүмкін болмады. Осы ретте жаңадан сайланған кей депуттатар нендей шаруа бітіріп жатқанын біз де бағамдадық! Гүлнәзия Жалғасқызының репортажында.

Боксшыларымыз жарады. Олимпиада ойындарында Әбілхан Аманқұл мен Қамшыбек Қоңқабаев алғашқы жекпе-жектерінде жеңіске жетіп, ширек финалға жолдама алды. Садақ атудан да ерлер арасындағы жекелеген бәсекеде Ильфат Абдуллин жолын сәтті бастады. Ал қыздар арасындағы теннистен жарыс жолында жалғыз қалған өкіліміз Елена Рыбакина жартылай финалды сүрінді. Ал әзірге үш қоланың екеуін Қазақстан қоржынына әкелген зілтеміршілер елге оралды. Төрт жылда бір келетін дүбірлі додаға …

Шымкентте «карантиндік шаралар күшейтіліп, базарлар екі аптаға жабылады» дегенді естіген саудагерлер бүгін шу шығарды. Онсыз да сауданың мәнісі болмай жатқанда, дәл осылай қыспаққа алғандары мүлдем ақылға сыймайды деп отыр. Қымбатшылық екі бүйірден қысқан шақта бала шағаны қалай асыраймыз деп ашуға булыққандар базардың жабылмауын талап етті. Егер қойған талаптары орындалмайтын болса, кәсіпкерлер күре жолдың бойында заттарын саудалаудан тайынбайтындарын айтады. Тілші толықтырады.

Бүгін белгілі режиссер Болат Атабаев жетпіс жасқа қараған шағында дүние салды. Теміртаудағы Неміс театрындағы еңбегімен танылған тұлға 40-тан астам спектакль қойып, бірнеше пьеса жазған. Ұстанымдарына берік, өнерге адал азамат туралы толығырақ сюжеттен көрейік.

Автопарк бізді алдап жүр! Семейдегі жолаушы тасымалына жауапты компанияның жұмысшылары бүгін тағы жолға шықпады. Мекемеде еңбек етіп жүрген 400-ге жуық қызметкер екі айдан бері жалақы алмағандарын айтады. Қаржыдан тарыққан жұрт несиені айтпағанда, ішерге тамақ таппай отырмыз деп налыды. Мәселенің мән-жайын тілшіміз сабақтайды.

Елордада карантин талаптарын ескермейтін кәсіп иелері азаяр емес. Әсіресе, күніне 1500 адам вирус жұқтырса да, қаладағы тамақтану орындары санитарлық-эпидемиологиялық жағдайға селқос қарайды. Сондықтан біздің арнамыз әкімдік пен жергілікті полиция өкілдері ұйымдастырған рейдке шықты. Тағы бір айта кететін жайт, 2 тамыздан бастап еліміздегі инфекция таралуы мен өлім-жітім көп бес қалада карантиндік талаптар күшейеді. «Ashyq» қосымшасына қосылмаған нысандар келесі аптадан бастап жабылмақ. …

Бизнес пе, әлде тұрақты жұмыс па? Қазақстандықтардың 30 пайызға жуығы мүмкіндік болса, жұмысын тастап өз ісімен айналысуды армандайды екен. Ал өзгелері тіпті шетелде жүріп, саяхаттауды ойласа, қалғаны 24 сағат отбасымен бірге болуды құп санайды. Ал сіздің таңдауыңыз қандай? Күніне офисте 8 сағат жұмыс істеп, бір айлыққа байланған дұрыс па? Тілшіміз мамандардың пікірін біліп қайтты.

Баспана деп сатып алғанымыз автотұрақ болып шықты! Елордадағы «Эко дом» тұрғын үй кешеніне қатысты дау туындады. Арнамызға шағымданған тұрғындар үш жылдан бері басыбайлы баспаналарының құжатын ала алмай жүргендерін айтады. Тұрмысқа жайлы деп алған пәтерлерінде былық көп болып шыққан. Тараптарды тілшіміз тыңдап қайтқан еді.

Тіршілік нәрінен тарыққан Алматы тұрғындары кездесуге аудан әкімінің келуін талап етті. Ала жаздай ауыз суға жарымаған жұртшылық шенеуніктер бұған дейін құрғақ уәдемен алдап келгенін жеткізді. Бұдан бөлек қара жол мен жарық мәселесі де шешілмей тұр екен. 2014 жылы ғана пайдалануға берілген ықшам ауданның жай-күйі туралы сюжеттен көрейік.