Новости

Педофил тапа-тал түсте 12 жастағы қызды зорлады. Күдікті арам пиғылын әжетханада іске асырған. Ал қылмысты тексерген тәртіп сақшылары буыны қатпаған мектеп оқушыларын тергеп, оларды сұрақтың астына алыпты. Бұған ашуланған ата-аналар бүгін білім ордасында айқай шығарып, жұмысына салғырт қараған мұғалім мен директордың жазалануын талап етті.

Елімізде әр бес жарым сағат сайын бір әйел зорланады, ал әр тәулік сайын бір бала зорлыққа ұшырайды. Ал, осы жылдың алғашқы жарты жылдығында 800-ге жуық қыз-келіншек зорланған. Ең өкініштісі, зәбір көргендер сол күні шағым жазбай, араға уақыт өткізіп алады екен. Сол себепті де абыройларының тапталғанын дәлелдей алмай жүреді дейді мамандар.

Азық-түліктің қымбаттауына жол берген шенеуніктер жауапқа тартылады. Тоқаевтың сынынан кейін ашуға мінген Үкімет басшысы Асқар Мамин министрлер кабинетіне осындай тапсырма берді. Мәселен, астықты аймақ Көкшетаудың өзінде ұнның бағасы 47 процентке көтерілген. Ал Сауда министрі Сұлтанов қарақұмық, яғни гречканың қымбаттауына Ресейдегі дәнді дақыл өнімінің аздығын себеп қылып, айды аспанға шығарды.

Лайксыз өмір. Енді Инстаграм желісінің қолданушылары өзгенің жазбасына басылған лүпілдің санын көре алмайтын болды. Бағдарламаны жасаушылар осы арқылы адамдардың арасында пайда болған өзара жарысты тоқтатамыз деп шешіпті. Көптің назары үшін жанын беретіндер енді қайтпек? Бұл әлеуметтік желі арқылы кәсібін жүргізіп отырғандарға қала әсер етеді?

Енді жоғары білім алғаны туралы дипломы жоқ болса да, іскерлігі мен өмірлік тәжірибесі, қарым-қабілеті жететін жандар ауыл әкімі болуы мүмкін. Ал, елді мекендердің шырайын келтіріп, күрделі мәселесін шешу үшін тек дәрігерлер мен мұғалімдер ғана емес, бухгалтерлер мен заңгерлер де жұмысқа тартылмақ. Өйткені, қазіргі таңда ауылдар осындай мамандарға зәрі екен. Бүгін Мәжілістегі Үкімет сағатында осындай өзекті мәселелер талқыланды.

«Еуразия» Бірінші арнасында жаңа жоба! Жаңа жылдан бастап, «Super Qala» бағдарламасы көрерменге жол тартады. Мақсаты еліміздің қай қаласында ең өнерлі жандар тұратынын анықтау. Өзге саланың мамандарын өзге қырынан танытатын жобаның алғашқы түсіріліміне тілшіміз де қатысып қайтты.

«Астана біздікі», «барлығын қырып саламыз» деп, қоғамды дүрліктерген қарулы жігіттер қолға түсті. Өткен жетіде былапыт сөздермен бүкіл Қазақстанға бейнежазба «сәлемдеме» жолдағандарды полиция тұтқындады. Арнайы операция кезінде видеодағы жігіттер белгісіз пәтерден табылғаны көрсетілген. Құзырлы органға сенсек, басты кейіпкер күні бүгінге дейін түрмеде отыруы керек екен. Алайда, заңның бостығын пайдаланып, ол мерзімінен бұрын бостандыққа шыққан.

Талдықорғанда шенеуніктер суда жүзуден жарысты. Облыстық турнирге өңірдегі мемлекеттік мекемелерден барлығы 8 команда қатысты. Мемлекеттік қызметшілер арасында салауатты өмір салтын қалыптастыруға бағытталған бұл шара алғаш рет ұйымдастырылып отыр.

Құлдықта өткен 20 жыл! Алматы облысында Ресей азаматы осынша уақыттан бері өзгенің малын бағып, үйін күзетумен келеді. Бұл қызметі үшін көк тиында алмаған. Құл демеске амал бар ма? Қожайындарының айтқанын бұлжытпай орындамаса соққыға жығылады. Қашайын десе қолында құжаты жоқ. Тау басында жалғыз өзі тұратын азамат, тілшімізден араша сұрады.

Әлемде жыл сайын жүректің ишемиялық ауруынан 17 миллион адам көз жұмады екен. Емі жоқ емес. Егер дұрыс емделіп, уақытында қаралса, 80 пайыз жағдайда инфарктің алдын алуға болады, дейді мамандар. Науқастың өмірін сақтап қалудың бір жолы — жүрек қан тамырларына стент орнату. Емдеудің инновациялық тәсілі еліміздегі кардиологиялық орталықтарда кеңінен қолданысқа енгізілуде.