Елімізде «Аңсаған сәби» бағдарламасының арқасында 15 мың нәресте дүние есігін ашқан.
Денсаулық сақтау министрлігінің мәліметінше, осы күнге дейін 37 мыңдай қолдан ұрықтандыру әдісі жүргізілген. Жылда бөлінетін квота 7 мыңға дейін ұлғайыпты. Нәтижесінде 15 мың отбасында сәбидің іңгәлаған үні естіліп отыр. Ведомство дерегінше, Қазақстанда отбасылардың 15 пайызы бедеулік мәселесімен бетпе-бет келеді. Сол үшін жылына 20 мыңнан астам ерлі-зайыпты медициналық көмекке жүгінеді екен.